بياض الثلج والأقزام السبعة| قصص ديزني بالعامية

بياض الثلج والأقزام السبعة, في يوم من الأيام كان في بنت اسمها فُلة وكانُوا بيسمُوها بياض الثلج لأن لون بشرتها بيضا بالظبط زي التلج, وكان أكتر شخص يناديها بالاسم دا هو ابن عمها سيف, كانت فُلة رقيقة جدًا وبتحب تخرُج علطول  للحديقة وتمسك الفراشات, كانت دايمًا مع نفسها لأن معندهاش صحاب, يا ترى إيه هُو سبب انطوائها دا وهل هي دي طبيعتها ولا في سبب تاني يخليها تفضل مع نفسها كدا, كُل دا هتعرفُوه على موقع أم دوت طفل في السطُور الجاية تحت خليكُوا معانا. بياض الثلج والأقزام السبعة| قصص ديزني

بياض الثلج والأقزام السبعة| قصص ديزني بالعامية

قصة بياض الثلج والأقزام السبعة بدأت إن بياض الثلج كانت قاعدة لوحدها في ملل, لحد ما جه حبيب القلب أخيرًا عشان كل الملل دا يرُوح وياخدها رحلة من غير أبُوها ما يعرف, يا ترى إيه اللي هيحصلها في الرحلة دي وهل هي هتقدر عليها الست الشريرة وتخطفها وسيف معاها, كل دا هنعرفُه هنا:

• السبب إن أبُوها كان بيخاف عليها من الهوا يعني مبيخليش أي حد يقرَب منها ولا إنها حتى تقرب من أي حد, يعني مكانتش بتعتب باب القلعة نهائي, لأن كان في يوم من الأيام عنده زوجة غير مراتُه اللي خلف منها فُلة.
• وانفصل عنها لما عرف حقيقتها والشر اللي بيجري في دمها من ناحيته هو وبنته, لأنها كانت بتخطط إنها تقتله وتتخلص منُه عشان تستولي على ثرواته, أبو فلة كان حاكم منطقة اسمها نينُوي.
• واللي وقعُه في الست دي زمان إنها سحرتلُه وبقا يشُوفها جميلة الجميلات وأعجب بيها, دا طبعًا بعد ما ماتت أم فلة وهي بتولدها.
• بس بعد ما اكتشف خيانتها بقا يحرَس جدًا منها ومن أي حد غريب مكانش أي حد غيره هو وابن أخوه يقدر يدخل القلعة بتاعته دا كله عشان خاطر السنيورة فلة.
• كان في خصال حلوة في أبو فلة إنه مش بيخليها تشيل من حد حتى لو الحد دا وحش, يعني ما كانش بيخوفها من الدنيا وإن فيها ناس أشرار وواحدة عايزة تقتلها والكلام دا, لأنه طبعًا حاطط في اعتباره إنه مفيش داعي هي أصلًا مش هتغيب عن عينُه.
• بس مكانش حابسها يعني كان بيخرُج معاها في رحلات سفاري على الحُصان بس مكانش بيرضى يخليها تطلع لوحدها.
• وفي يوم رجع ابن عمها أخيرًا من السفر الطويل وقرَر يعمل مُفاجئة لفلة, فراح المكان اللي بتحب تقعد فيه كالعادة مع نفسها, وراح قاطفلها وردة وإداهلها من ورا ظهرها, هي أخدت بالها وراحت باصة ليه لقاتٌه سيف حبيب القلب.
• ففلة راحت معيطة وقالتله وحشتني إيه كل الغياب دا أنا مستنياك بقالي كتير كدا تعمل فيا كدا, طبعًا فلة كانت متعلقة جامد بابن عمها كانت بتعتبره أخوها وحبيبها في نفس الوقت.
• فرد سيف عليها وهو متأثر ي حببتي والله غصب عني تعرفي أنت مغيبتيش عن بالي طول السنين دي, كل ساعة بفكر فيكي, لا مش ساعة دا كل دقيقة والله ي فلة.
• كان في مشاكل بينا وبين الأقاليم المُجاورة, واللي غيبني عنك شوية حروب كدا عدت على خير في النهاية الحمدلله.
• ففلة ابتسمت وقال الحمدلله إنك رجعتلي بالسلامة, المُهم توعدني متكررهاش تاني وإلا هزعل أوي منك, وطبعًا هو وعدها بكدا.

مواضيع قد تهمك: علاء الدين وياسمينا| قصص أطفال مكتوبة. بياض الثلج والأقزام السبعة| قصص ديزني

رحلة سيف مع فلة في قلب الغابة| قصص ديزني بالعامية

سيف قرَر ياخد فلة عشان يفسحها ويخرجها شوية بحيث يكونوا مع بعض لوحدهم, ويقدر بكدا يعترفلها بحبه بس حصل اللي مكانش مُتوقع وفلة اختفت يا ترى إيه اللي هيجرالها, وهو هيقدر يروح من غيرها كل دا هتعرفوه في السطور الجاية من قصة بياض الثلج والأقزام السبعة الجزء الثاني:

• وراح يطلب من والد فلة إنه يسيبهاله شوية يفسحها وقاله والله ي عمي إنت عارفني عمر عيني م تنزل من عليها متخافش, بس برضو أبوها رفض وخذله عشان عارف ممكن نتيجة خروجها توصلها لإيه.
• بس سيف قال لفلة متقلقيش أنا هتصرف كل دا عشان خاطر عيونك, بس لازم نرجع من رحلتنا قبل الساعة خمسة بالليل عشان محدش يحس بغيابك في القلعة, وبعدين لبسها لبس الحارس الشخصي بتاعُه وركبت وراه على الحصان.
• فجأة اعترض طريقهم راجل عجوز غلبان قال لسيف أنا جعان ومش معايا تمن رغيف عيش إديني أي حاجة, بس سيف مكانش معاه أي حاجة في الوقت دا يساعد بيها الراجل العجوز, ومشي بالفرس بتاعه وهو مُتجاهل الراجل.
• بس فلة وقفته غصب عنه وقالتله مينفعش لازم نساعده, وراحت نزلت من على الحصان واداتله عملة كانت معاها مُحتفظة بيها, وقالتله تقدر تشتري بيها الخبز اللي إنت عاوزه, وبعدين راحت ركبت ورا سيف على الحصان وانطلق بيها للغابة.
• في الغابة كان سيف بيكلمها عن الحواديت الخيالية اللي كانت بتفرح بيها وهي صغيرة, وحكايات الأقزام اللي عايشين في الغابة دي, وهي متحمسة كل م يجيبلها سيرتهم وكان كل ميبُصلها يضحك عشان هي بتصدق أي حاجة بيحكيهالها.
• وقالها يلا يستي إحنا هننزل هنا نرتاح ونزلها من على الحصان, وسابها ثواني عشان يغسل وشه في الشلال اللي كان قصاده.
• وبعدين بيمسح وشه بهدومه ولسا بيقولها بصي ي فلة أما أنا هوريكي حتة مٌفاجئة هتعجبك, لقاها مش موجودة معاه ونادى عليها وفضل يدور كتير ملاقاهاش.
• بقا سيف يدور على حبيبته زي المجنون وبقا مش عارف يتصرَف إزاي, فضل ساعات يدور ومفيش فايدة وبقا حتى مش قادر يرجع من غيرها القلعة وهيقول لأبوها إيه, أنا أخدت بنتك وعصيت أوامرك وضيعتها.

مواضيع قد تهمك: قصص أطفال ديزني| رابونزل. بياض الثلج والأقزام السبعة| قصص ديزني

حلم فلة بيتحقق| قصص ديزني بالعامية

فلة بياض الثلج كان ليها حلم وهي أنها تشوف الأقزام السبعة اللي كان بيحكيلها عنهم سيف, وطبعًا كانت مصدقة جدًا حكايتهم رغم أنه كان بيضحك عليها ومكانش الموضوع دا حقيقي بالنسباله, عشان تعرفوا التفاصيل تابعوا معانا الجزء الثالث من قصة بياض الثلج والأقزام السبعة:

• قرَر الأمير يفضل يدور جوا الغابة لحد ميلاقيها, وفي اللحظة اللي غابت فيها فلة عنه كانت أكلت عُشبة مُنومة نيمتها ساعات طويلة, وكان تحتها حفرة بتاعت أقزام عددهم 7 كانوا سايبين منهم واحد, هو اللي بيحضرلهم الأكل عبال م يرجعوا من الشغل.
• وهو شافها نايمة راح ساحبها من الحفرة بتاعته للبيت بتاعهم اللي تحت الأرض, ونيمها في أوضته وهُو مُعجب بيها وبجمالها
• وفجأة رجعوا الأقزام الستة صُحابه من شغلهم ونادوا على صاحبهم مردش عليهم, كان مشغُول في المطبخ طلعوا فكرُوه نايم عشان يصحُوه.
• لاقو فلة نايمة وممددة على الأرض وحجمها كبير هم اتخضوا في البداية بس بعدين بعد ما عرفوا إن مفيش خطر وهي نايمة عادي, قرَب واحد منهم وهو دا القزم الصغير اللي حبها من أول نظرة وباسها من خدها.
• بعد بوسة القزم الصغير صاحبهم فلة صحيت وعينها فتحت ورموشها بربشت, إتفزع القزم الصغير اللي قريب منها ووقع والأقزام إتخضوا برضو وبعدوا بس هي ابتسمتلهم وقالتلهم إنتو الأقزام السبعة, أنا كنت متحمسة أشوفكوا أخيرًا لقيتكوا.
• وقعدت تحكيلهم قصتها مع حبيبها سيف وحكاياته عنهم وحُبها ليهم قبل م تشوفهم, وإرتاحولها جدًا وحبوها كلهم وقالوا دي لازم تفضل معانا.
• وبعد ما عدا يومين بالظبط قررو الأقزام إنهم يلاقوا لفلة مكان أوسع من بيتهم, يكون على أدها عشان تحس إنها مرتاحة وفي نفس الوقت يحافظوا عليها عشان هي أمانة برضو عندهم, فلقوا مكان كبير جدًا هو مُخيف شوية بس مفيهوش حد ومهجور ومفيهوش أي خطر على فلة.
• فقالو لفلة إنت تباتي هنا ومتخافيش إحنا جنبك هنجيلك كل يوم بعد م نخلص شغلنا, نقعد معاكي النهار كله وبالليل نرجع ننام في حفرتنا ونسيبك تنامي هنا.
• فلة وافقت وهي مبسوطة بس برضو حست بالذنب ناحية سيف, هي إزاي تعمل فيه كدا وتعرضه لعقاب والدها وبين الوساوس اللي في دماغها والأفكار الكتيرة الملخبطة.

مواضيع قد تهمك: قصص أطفال ديزني| أسطورة ميردا. بياض الثلج والأقزام السبعة| قصص ديزني

تسمم فلة بالتفاحة المسمومة| قصص ديزني بالعامية

أخيرًا الجزء الأخير من قصة بياض الثلج والأقزام السبعة بيحكيلنا إن فلة هتتعرَض للخيانة, والست الشريرة هتتمكن منها وهتأكلها تفاحة هيديهالها راجل عجوز شغال تبعها, يا ترى فلة هتموت ودي نهاية القصة؟, ولا في نهاية تانية أجمل وفلة هتفوق؟, تابعوا معانا على موقع أم دوت طفل التفاصيل:

• قرَرت فلة تخرج تدور على سيف في الغابة, ولاقت نفس العجوز اللي كان في المدينة بيعرض عليها تاخد هدية بمناسبة إنها ساعدته يجيب أكل ويسد جوعه.
• فعلا أخدت التفاحة اللي إداهلها وأكلت منها ووقعت في ساعتها, في الحقيقة كانت التفاحة مسمومة وكان الراجل دا تبع الست الشريرة اللي كانت مرات أبوها في يوم من الأيام.
• وبعد دقايق رجع القزم الصغير من شغله فلقى فلة مرمية على الأرض قصاده فصوَت ولم الأقزام كلهم حواليها.
• وفضلوا ساعات يصحوا فيها ومفيش أي نتيجة وبعدين جمَعوا شوية أعشاب طبية عشان ينقوا دمها من السم, وشربوها منه وسابوها فترة ومفيش أي نتيجة برضو, ولما يأسوا قرروا يدفنوها في تابوت من الأزاز.
• وقالوا إحنا مش قادرين نخبيها عن عينا, كدا أحسن عشان نحس إنها لسا موجودة معانا, وحاطوها برا الحفرة بتاعتهم عشان كل ما يخرجوا منها يشوفوها قصادهم.
• وأخيرًا بعد ما مر 3 أيام من غيبوبة فلة لاقاها سيف, وخرجها من التابوت وقعد يفوق فيها ومفيش أي نتيجة وباسها وقالها قومي ي حببتي وفضل يعيط عشانها, وهي فاقت وهي بتقول أنا فين كان لسه فيها أثر الغيبوبة بس كانت فايقة إلى حد ما.
• وبعدين سيف فرح وشالها وحطها على الحصان بتاعه عشان يروح بيها القلعة, في اللحظة دي طلع قزوم الصغير من الحفرة وقاله إثبت مكانك إنت واخد عروستي ورايح بيها على فين ي حرامي.
• فسيف إتفاجيء وابتسمت فلة وقالتله دا حبيبي سيف, وقعدت مع سيف وطلع الأقزام كلهم حواليهم وهي بتحكيله حياتها معاهم في غيابه وشكرهم على كل اللي عملوه عشانها, ورجعوا للقلعة وفي النهاية إتجوزوا في قلعة والدها الحاكم وتوتة توتة خلصت الحدوتة.

مواضيع قد تهمك: قصص أطفال قبل النوم مكتوبة| الجميلة والوحش. بياض الثلج والأقزام السبعة| قصص ديزني ودي هي نهاية قصة بياض الثلج والأقزام السبعة, ونتمنى إنكم تكونوا استمتعتم معانا بالحكاية الخيالية دي, تابعوا معانا على موقع أم دوت طفل في حكايات أحلى وأجمل بكتير إستنونا في قصص تانية كتير.