علاء الدين وياسمينا| قصص ديزني بالعامية

علاء الدين وياسمينا, في يوم من الأيام كان فيه شاب اسمه علاء كان بيحب يتمشى كتير لوحده في شوارع مدينته نيسان من غير هدف والسبب أنه مكانش ليه صاحب ومكانش ليه حتى وظيفة ياخد منها فلوس تأكله عيش,  بالرغم من كدا مكانش بيحس أنه وحيد دا بالعكس جدًا كان مُتفائل بأنه هيلاقي أكل كل يوم من القرص اللي كان بيسرقها من الفرن القريب من خيمته. عايزين تعرفوا حكاية علاء الحرامي وإزاي إتحول لأمير, كملوا القصة معانا على موقع أم دوت طفل هتعرفوا السر. علاء الدين وياسمينا| قصص ديزني

علاء الدين وياسمينا| قصص ديزني بالعامية

بدأت قصة علاء الدين وياسمينا بإن كل واحد كان ليه حكاية علاء حياته مملة وكل اللي بيعمله إنه بيسرق وبس, وياسمينا حياتها مملة ومش عارفة تهرب من البيت إزاي, بس الفكرة هتجيلها وهتخرج عشان تبدأ الحكاية بجد وتشوف حبيب القلب تابعوا على موقع أم دوت طفل الجديد:

• وفي يوم من الأيام حس علاء الدين إنه جعان كان في عز الظهر وحابب ينزل لنفس المخبز تاني يسرق منه زي مبيعمل كل مرة من غير ما صاحبه ياخد باله, , بس المرة دي الراجل شافه صاحب الفرن وقال بصوت عالي: حرااامي امسكوا الحرامي دا.
• بس طبعًا علاء مش من طبعه إنه يسيب حد يمسكه كدا بسهولة, كان جريه سريع أوي زي الفران وبيتشعلق في الحبال زي طرزان وبيطلع على المباني العالية زي القرود, لدرجة إنه ناس كتيرة حاولت تقبض عليه بس برضو معرفوش يمسكوه لحد دلوقت.
• فضل يجري علاء لحد أخيرًا م وصل لمكان كدا فوق هضبة الهضبة دي بتبص على قلعة الوالي من بعيد, وفوقها كان بيته اللي عامله من الخشب والقماش يعني تقدروا تقولوا عليه خيمة.
• في الفترة دي كان والي مدينة نيسان مشغول جدًا في أوضاع البلد السياسية ومش فاضي لبنته اللي كانت طول الوقت بتلح عليه إنها تخرج لوحدها في وسط شوارع المدينة وتشوف الناس.
• وحاولت كتير تقنعه إن مش هيحصلها حاجة وإن شعب نيسان طيبين, وطبعًا كل مرة أبوها يقولها إطلبي اللي إنت عاوزاه وهو يجي لحد عندك, مكانش حارمها من حاجة أصلها كانت بنته الوحيدة الدلوعة.
• وكانت حاجتها بتيجي مستوردة من برا, كان بيبعت الحراس يجيبوها عشانها مخصوص من هناك بأسعار غالية جدًا, يعني تقدروا تقولوا كدا مكانش ناقصها حاجة غير إحساسها بالحرية, بس أبوها كان مفكر إن هو كدا موَفرلها كل حاجة والمفروض إنها تكون فرحانة.
• تاني يوم بعد م طلبت الأميرة تاني نفس الطلب من أبوها الوالي إنها تخرج تشم الهوا لوحدها في المدينة, دي كانت تقريبًا المرة الألف رفض تاني وقالها متفتحيش الموضوع دا تاني خالص معايا.
• الأميرة ياسمينا كانت عنيدة وقالت ماشي أنا هعرف أخرج من هنا بطريقتي, فعلا أخدت لبس خدامه من عندهم ولبسته وقررت إنها خلاص تخرج من غير م حد يحس.

مواضيع قد تهمك: علاء الدين وياسمينا| قصص أطفال مكتوبة. علاء الدين وياسمينا| قصص ديزني

الأميرة ياسمين مع علاء الدين في خيمته

قصة علاء الدين وياسمينا الجزء التاني تبدأ بإن علاء كالعادة نزل عشان يسرق, وكانت الصدفة إنه يشوف بنت حلوة بس مخبية ملامحها باللبس اللي عليها, ويتفاجيء بعدين إنها بنت الوالي ويقع في حبها, يا ترى حصل كدا إزاي؟, كل دا هتعرفوه على موقع أم دوت طفل في السطور الجاية:

• بحجة إنها طالعة تشتري خضار من سوق المدينة, عشان الطباخ قال في نقص في الخضار اللي بيتعمل منه أكل الوالي وزوجته وبنته.
• فعلا عرفت الأميرة تضحك على الحراس وطلعت وهي فرحانة كانت لابسة طاقية على شعرها نازلة على عنيها عشان متبانش, وبالتالي محدش من الحرس اللي على باب القلعة يعرف إنها الأميرة ياسمين ومتخفية في الزي دا.
• وراحت تمشي في كل مكان عشان تشوف حال الناس عامل إزاي والحياة برا شكلها إزاي ولقت إن كل حاجة طبيعية جدًا, لحد ما شافت شاب كدا واقف قصادها بيهزلها حواجبه وفجأة قرب منها ورفع من على راسه طاقيته وهو بيلعب في شعره.
• وقالها مالك كدا واقفة مش شايفك بتشتري وقاعدة تبُصي للناس ومركزة معاهم شكلك حرامية زيي, بس هي مهتمتش لكلامه وكانت بتدير ظهرها عشان تمشي راح ماسك ذراعها وقالها إستني إستني, لو جعانة أنا مُمكن أجيبلك التفاحة دي شكلك مُبتدأة في المجال دا.
• وقالها الموضوع عادي جدًا البياع مشغول مع الست اللي بيبيعلها والتفاح كتير ربنا يبارك, وكان لسا بيمد إيده ع التفاحة عشان ياخدها راحت ياسمين مصرخة في وشه وهي بتقوله لا إوعى تعمل كدا.
• في الوقت دا علاء مكانش يتوقع إن البنت تفضحه, والبياع شافه وفكرهم هم الإتنين مع بعض حرامية فطلع يجري وراهم.
• كمان خلى الناس تجري وراهم والعمال اللي عنده بيساعدوه, بس علاء جري وياسمينا وراه وهي مش عارفة تنقذ نفسها من الورطة دي ازاي, وعلاء كان بيشجعها إنها تهرب وتجري أسرع عشان متقعش في إيدهم ويضربوها.
• بس هي مقدرتش وكانت بتبطأ عشان تاخد نفسها كويس, وهو عمل موقف شهم معاها وكان بيرمي طوب وجراكن من فوق على الطريق اللي هم بيمروا بيه عشان مش يوصلولها, وفجأة راح شايلها ونط بيها على أسطح البيوت لحد م وصل البيت بتاعه.

مواضيع قد تهمك: قصص أطفال ديزني| رابونزل. علاء الدين وياسمينا| قصص ديزني

حب علاء للأميرة ياسمين من أول نظرة

علاء في الأول كدا كان بيساعد ياسمين على سبيل الجدعنة من غير ما يشوف شكلها, بس بعد ما شافها كل حاجة إتغيرت هو نفسه اتغير 180 درجة, معقولة علاء هيسمع كلام ياسمين ويبطل سرقة, ولا هيكمل فيها وياترى هيتقابلوا تاني؟, كل دا هتعرفوه في قصة علاء الدين وياسمينا الجزء التالت:

• زهقت ياسمين من الوضع اللي حصل دا وقالت لعلاء بص اللي إنت عملته دا غلط, قالها ليه عشان بجيب لنفسي أكل يخليني أعرف أعيش, علفكرة أنا مش بسرق فوق كفايتي باخد اللي يخليني أقدر أتحرك وخلاص.
• ياسمينا كانت بتسمعه وهي معجبة بيه هي أصلا حبته من وقت ما أنقذها من الناس اللي كانوا هياكلوها علقة محصلتش, هي أعجبت بشهامته بس برضو دا ميمنعش إنه مُذنب عشان هو حرامي.
• وهي سرحانة في اللي هي فيه وتفكيرها في علاء وليه بيعمل كدا وهل ممكن يتغير ولا لا علاء قالها هاااااا ايه ي بنتي روحتي فين, أنا عاوز منك طلب دا لو مش يدايقك طبعًا.
• ممكن تعرفيني إنت مين ولو مش كنتي جاية تسرقي إيه اللي ورطك معايا في السكة دي, راحت ياسمينا كاشفة الحجاب عن راسها وبان شعرها الجميل وعيونها الأجمل وفي اللحظة دي علاء أعجب بيها أوي وقالها أنت جميلة.
• فقالتله أنا اسمي ياسمين وبيدلعوني ياسمينا وأنا أبقا بنت حاكم المدينة وقلعتي هناك ووقفت وشاورتله عليها من ورا قماش الخيمة بتاعته.
• وقالتله إنت لازم تشوفلك شغل وإلا هكلم والدي عنك ومش هيرحمك انت حر بقا, وفعلا علاء فضل على وعده معاها ومبقاش يسرق تاني خالص.كان كل اللي بيعمله إنه يفكر فيها وفي جمالها ومش عارف يعمل اي لا بياكل ولا بينام ونفسه يشوفها تاني.
• وفي يوم وهو ماشي بالليل تايه في نفسه رجله خبطت في حاجة زي حجرة كدا, راح شايطها بعيد عنه رجعتله تاني. بصلها لاقاها براد صغير قديم راح واخده ورماه بإيده بعيد, البراد رجعله تاني وخبط في دماغه.
• في الحقيقة البراد دا كان أصلًا هو أساس كل الحكاية اللي حصلت لعلاء الدين, هو اللي شقلب كيانه وحياته كلها وبقا الأمير علاء الدين.
• دا لما طلب من عفريت المصباح إنه يخليه كدا ودي أول أمنية ليه وراح لقلعة الوالي عشان يخطب بنته بهدايا كتيرة أوي وغالية كلها من الذهب والياقوت, وكان حواليه ناس بيدقوا ع الطبول وبيغنوله وحراس كتير أوي.
• وراح علاء يتقرَب من الملك ويقوله ي عمي أنا طالب إيد بنتك ياسمين,ا إنا مشوفتهاش بس سمعت إن أخلاقها جميلة وجمالها يفوق جمال أي أميرة من البلاد المجاورة لبلادي.

مواضيع قد تهمك: قصص أطفال قبل النوم مكتوبة| الجميلة والوحش. علاء الدين وياسمينا| قصص ديزني

حفلة تعارف بين الأميرة ياسمين والأمير علاء

علاء الدين في الجزء الرابع من قصة علاء الدين وياسمينا كان هدفه إن الأميرة تحبه, مكانش حاطط في باله إنه كدا بيخدع الوالي وبينته, بس بعدين فكر كويس وقال لا أنا اللي بعمله غلط ومشي, يا ترى علاء هيتخلى عن ياسمين بالسهولة دي؟, دا اللي هنعرفه في الجاي:

• والوالي أعجب بلباقته في الكلام وطريقة مدحه في بنته ووافق إنه يعمل حفلة تعارف بينهم عشان يتكلموا ويفهموا بعض أكتر, وأول م الأميرة شافته في الحفلة بيقرب عليها وبيقولها إزيك قالتله هو أنت العريس, راح رد عليها وبكل فكاهية: آه طبعًا ليه هو أنا مشبهش ولا إيه.
• قالتله لا إزاي أنت تشبه أوي واحد كدا بس معقولة, وبعدين سرحت شوية في شكله بس إيه اللي ممكن يقلب كيانه كدا لا أكيد مش هو, دا أمير وابن ناس شعره مترتب وجميل ووشه نضيف ووسيم.
• علاء الدين كان حابب يخلي الأميرة ياسمين تحبه أكتر ما هو بيحبها, مكانش عايز يفضل مدلوق عليها كدا طول الوقت وهي منفضاله.
• فطلب تاني أمنية من العفريت بتاع المصباح السحري إنه ينشُر تراب سحري على سجادة حلوة اشتراها من السوق.
• وقاله: خليها تطير ي جني إتصرف, وراح بيها لشرفة الأميرة ونادلها بهمسات كدا: بس بس ياسمينا أنا هنا تعالي هوديكي في رحلة حلوة بين النجوم بس إنت سيبيلي نفسك وغمضي عينك.
• فعلا الأمير علاء أخد قلبها وبقت تحبه أكتر وأكتر لحد م جه وقت زهق فيه الأمير من أفعاله وحس بالذنب وقال كفاية كدا, لازم كل حاجة تخلص لحد هنا هي أميرة وأنا ولا حاجة ورمى المصباح.
• واختفى خالص ومبقاش يظهر والأميرة قلقت عليه وسألت عليه الحراس, ففيه واحد فتن عليه كان شافه صدفة وهو ماسك مصباح قديم وفجأة إتغير مظهره من أمير لشاب عادي كحيان.
• وراحت لعلاء ووقالها شوية كلام كدا عن إحساسه بالذنب وهو كان عايزها تحبه والحكاية تكمل, بس مش لازم كل حاجة عايزينها بناخدها.

مواضيع قد تهمك: ما هي الحيوانات الأليفه| حيوانات أليفه للمنزل. علاء الدين وياسمينا| قصص ديزني

زواج علاء من ياسمينا| قصص ديزني بالعامية

في السطور الأخيرة من قصة علاء الدين وياسمينا هنلاقي إن ياسمين رضيت بيه شاب كحيان, بس هتحصل مؤامرة ضد الوالي وأهله وهتتخطف ياسمين, هل يا ترى علاء هيقدر ينقذها هي وأهلها ولا هيسيبها لنصيبها؟, دا اللي هتعرفوه في السطور الجاية:

• الأميرة ياسمين ضحكت كدا وقالت علفكرة كنت حاسة إن أنت علاء وعادي لسا بحبك حتى وإنت فقير, إنت من أول مرة إتقابلنا فيها دخلت قلبي وحبيت الأمير علاء عشان شبهك.
• فرح علاء الدين بكلامها ورجع يسألها هل أبوها هيوافق عليه بعد كل اللي كان ولا ممكن يعاقبه إنه إتجرأ وكذب عليه, لكن الأميرة تبتسمله وتقول له أن والدها سابلها الحرية إنها تختار شريك حياتها.
• وقالها إنه أيًا كان إختيارها هيوافق عليه المهم إنها تكون هي اللي عايزة كدا, وهو مش هيقف في طريق سعادتها.
• علاء فرح جدًا بكلامها وقالها طيب ووالدك الوالي هقوله إيه هيكتشف إني خدعته ومش هيسامحني, قالتله بس سيبها عليا, هو أصلًا قالي اللي قلبك يختاره مش هعترض عليه وأنت ونصيبك حتى لو واحد كحيان, وغمزتله وقالت زيك كدا ي علاء.
• علاء راح معاها القلعة بعد مضحكت عليه بكلامها الحلو وهو لسا مرعوب ليكون والدها رأيه غير كدا, ويعاقبه على كل اللي فات بس الحظ لعب معاه.
• ولقى في مؤامرة بتحصل في القلعة بتاعته كان باين جدًا انه اتخطف وفي ناس قابلتهم على باب القلعة عايزة تقتل علاء وخطفت منه الأميرة ياسمين.
• علاء مقدرش يعمل حاجة غير إنه يهرب ويطلب آخر أمنية ليه من العفريت, وهي إنه ينقذ الوالي وزوجته وبنته وفعلا حصل والوالي عشان يعبر عن شكره لعلاء الدين جوزه بنته.
• وعلاء قعد في الأرض وحط خاتم من الدهب كان لسا معاه من ساعة ما كان أمير غني في إيد الأميرة ياسمينا, وقالها أنا أسعد واحد وهشيلك في عيوني.
• وإتعمل ليهم زفة حلوة متعملتش لحد قبل كدا جوا القلعة, حضر فيها الكبراء والأعيان والناس الغنية وفي النهاية كل حاجة سكتت الموسيقى بطلت والشموع إنطفت, ودخل علاء الدين وياسمينا أوضتهم عشان يستمتعوا بليلتهم.

مواضيع قد تهمك: هل تعلم للأطفال| معلومات عن الحيوانات للأطفال. علاء الدين وياسمينا| قصص ديزني وكدا تكون حكايتنا خلصت عن علاء الدين وياسمينا ونتمنى إنها تكون عجبتكم, ولو عايزين قصص تانية كتير حلوة وخيالية تابعونا على موقع أم دوت طفل هتلاقوا معانا كل جديد وممتع, سلام.